Verska kuulutaminõ kuts riiki tunnistama, et Eestin ommaq olõman põliskeeleq
Mahlakuu 18. pääväl võtť Eesti põlitsidõ kiili kuuntüükogo vasta Verska kuulutamisõ, minka kutsutas üles Eesti riiki tunnistama, et Eestin ommaq olõman põliskeeleq ÜRO üleilmalidsõ põliskiili aastagakümne 2022–2032 tähendüsen. Päält taa soovitasõq kuuntüükogo liikmõq alostaq riigi tegemiisiplaani kokkopandmist põliskiili aastagakümne elloviimises Eestin ni põliskiili mõistõq keelesäädüsen paika pandaq.
Verska kuulutaminõ
Verska kuulutamisõ kõgõ päämäne sõnnom om, et üleilmalinõ põliskiili aastagakümme pututas õkva ka Eestit: miiq ku Eesti põliskiili – võro, seto, mulgi, kihnu keele ja Kuusalu rannakeele – kogokundõ iistkõnõlõjaq kuuluda, et ka Eestin ommaq olõman põliskeeleq üleilmalidsõ põliskiili aastagakümne tähendüsen. Nii pututas jo pääle naanuq üleilmalinõ põliskiili aastagakümme õkva ka miiq kogokundõ ja Eesti riiki.”
Kuulutamisõ perrä om päälenaanuq põlitsidõ kiili aastagakümme ”võimalus viil inämb ja parõmbahe tukõq Eesti põliskiili elojovvu alalõhoitmist ja vahtsõt virgutamist maailma põlisrahvidõ ja põliskiili kogokundõ kõgõ parõmbidõ tiidmiisi ja tegemiisi abiga.”
Püürdümisele ala kirotanuq ütisüseq pidäväq tähtsäs, et ”järgmädse kümne aastaga seen kasunuq Eesti põliskiili kõnõlõjidõ arv, et miiq kiili pruugitasiq egä päiv nii koton, koolin, meediän ku aśaajamisõn.”
Verska kuulutamisõga soovitõdas Eesti Vabariigil 2022. aastaga seen kokko pandaq riiklinõ tegemiisiplaan üleilmalidsõ põliskiili aastagakümne elloviimises üten põliskiili kogokundõga, ni keelesäädüste mano pandaq Eesti põliskiili mõistõq kuunkõlan rahvidõvaihõliidsi hüvvi praktikidõ ja Eesti põliskiili kogokundõ tarviduisiga.
Verska kuulutamisõ täüsteksti saa lukõq tast: [uralic.org]
Eesti põliskiili kogokundõ tsõõriklaud Verskan
Mahlakuu 13. pääväl peeti Verskan Eesti põlitsidõ kiili kuuntüükogo tsõõriklaud, kon arotõdi Eesti põliskiili parhillast saiso ni plaaniti ütitsit tegemiisi jo päälenaanul üleilmalidsõl põliskiili aastagakümnel. Tsõõriklavvast ossavõtnuid tervüť põliskiili aastagakümne koordiniirjä Irmgarda Kasinskaite-Budderberg UNESCO pääkortinast Pariisist, üleilmalidsõ põliskiili tüürühmä iistvitäi Richard Grounds (Oklahoma, USA), soomõ-ugri rahvidõ konsultatiivkogo KKFUN edemiis Dimitri Harakka-Zaitsev, ÜRO põlisrahvidõ püsüfoorumi UNPFII liigõq Sven-Erik Soosaar, Fenno-Ugria Asotusõ tekevjuht Viia-Kadi Raudalainen ja Seto Kongressi Vanõmbidõ Kogo päävanõmb Vello Saar.
Ettekandõ üleilmalidsõ põliskiili aastaga 2019 opitunnõst Eesti jaos pidi Oliver Loode (URALICu Keskus), ülekaehusõ põlitsidõ kiili aastagakümne plaanmisõst UNESCOn ni ildaaigo valmis saanust seto keele arõnguplaanist tekḱ Rein Järvelill (Seto Infoselts). Päält tuu kitediq tsõõriklavval hääs Verska kuulutamisõ tsihiq ni naidõ täütmises tarvilidsõq tegemiseq.
Üleilmalinõ põliskiili aastagakümme 2022–2032
2019. aastaga joulukuun kuuluť ÜRO Pääassamblii vällä üleilmalidsõ põliskiili aastagakümne 2022–2032 (International Decade of Indigenous Languages), et juhtiq tähelepanno palľodõ põlitsidõ kiili väega kehväle saisolõ üle ilma ni takast tougadaq tegemiisi naidõ kiili alalhoitmisõs, vahtsõlõ elolõ virgutamisõs ja edendämises. Põliskiili aastagakümme om pikendüses üleilmalidsõlõ põliskiili aastagalõ 2019, mink juhtkogon olľ osalinõ ka Eesti. UNESCOn vasta võet põliskiili aastagakümne üleilmalinõ tegemiisiplaan kuts üles liikmitriike kokko pandma uma riigi tegemiisiplaanõ põliskiili aastagakümne tsihte elloviimises üten põlisrahvidõ asotuisi ja ütisüisiga ni mitmõsugutsidõ riigi- ja tiidüsasotuisiga. Põlitsidõ kiili aastagakümne ammõtlinõ võrgoleht om [idil2022-2032.org].
Eesti põlitsidõ kiili kuuntüükogost
Eesti põlitsidõ kiili kuuntüükogo om mitteammõtlik kuuntüüvõrgostik, mink liikmis ommaq Eesti põliskiili kogokundõ iist saisjaq ni naid tugõjaq asotusõq. Kuuntüükogo alosť 2020. aastaga vahtsõaastakuun tsihiga pakkuq Eesti põlitsidõ kiili kogokunnõlõ huvikaidsõt nii Eestin kui rahvidõvaihõlidsõlt, seletäq Eesti põliskiili saiso laembalõ avalikkusõlõ ni vaihtaq hüvvi praktikit põliskiili edendäjidega üle ilma. Eesti põlitsidõ kiili kuuntüükogo ja tuu liikmõq võtvaq tegüsähe ossa üleilmalidsõ põliskiili aastagakümne 2022–2032 läbiviimisest. Uma iistkõnõlõja Rein Järvelilli läbi om Eesti põlitsidõ kiili kuuntüükogo edüstet UNESCO koordineeritävän põliskiili aastagakümne juhtkogon.
Fotoq 13.04.22 Verska tsõõriklavvalt: [flic.kr] (autor: Indrek Sarapuu)
Teedüs:
Rein Järvelill (rein@seto.ee , +372 504 6423)
Oliver Loode (oliver.loode@uralic.org , +372 513 2992)